Margrét Baldursdóttir

Laugardaginn 4. júní 2022 verður haldinn styrktar- og gönguviðburðurinn GÖNGUM SAMAN Í ÞÓRSMÖRK. Markmið viðburðarins er að koma saman, njóta frábærrar útivistar í einstakri náttúru og safna um leið fé til styrktar rannsóknum á brjóstakrabbameini.

Ferðaþjónustufyrirtækið Volcano trails, í samvinnu við Göngum saman, hefur skipulagt frábæra dagskrá þar sem boðið verður upp á rútuferðir, göngu, grillveislu og kvöldvöku við varðeld. Lagt verður upp frá Húsadal og gönguleiðsögn verður um þrjár mismunandi leiðir svo allir ættu að finna göngu við hæfi. Þátttakendur greiða skráningargjald sem rennur óskipt í styrktarsjóð Göngum saman, auk þess sem Volcano trails leggur fram mótframlag.

Nokkrir mismunandi gistimöguleikar eru í boði alla helgina og veitingasala er í Húsadal.

Dagsferð er einnig möguleg og eru rútuferðir í boði frá ýmsum stöðum.

Göngufólk getur einnig lagt málefninu lið með því að safna áheitum fyrir gönguna.

Nánari upplýsingar og skráning  HÉR.

Nú nálgast mæðradagurinn og eins og undanfarin ár standa snillingarnir hjá Brauð&co fyrir fjáröflunarátaki fyrir styrktarsjóð Göngum saman.

Stuðningur þeirra hefur verið félaginu afar mikils virði.

Alla vikuna 2. – 8. maí verða gómsætir hindberjasnúðar seldir í bakaríum þeirra og rennur allt söluandvirði snúðanna óskipt í styrktarsjóðinn.

Nú treystum við á að velunnarar  Göngum saman geri sér dagamun, kaupi gómsæta snúða og styrki um leið félagið.

Verði ykkur að góðu!

Í Reykjavík er gengið á mánudögum kl. 20.00. Á facebook síðu Göngum saman má sjá hvaðan gengið er hverju sinni en við byrjum við Hallgrímskirkju.

Á Akureyri er gengið á þriðjudögum kl. 17. Fylgist með þriðjudagshóp GS á facebook til að fá nánari upplýsingar en fyrsta gangan verður frá Íþróttahöllinni.

Vegna hertra samkomutakmarkana verða ekki skipulagðar göngur í Reykjavík næstu mánudaga.

Við hvetjum samt alla til að hreyfa sig eftir því sem kostur er og vonumst til að við getum tekið upp þráðinn fljótlega.

Fyrsta ganga ársins í Reykjavík verður mánudagskvöldið 10. janúar og verður lagt upp frá Hallgrímskirkju kl. 20.

Við hvetjum göngufólk til að huga vel að skóbúnaði og fara varlega, það er launhált í borginni.

Göngugarpar í Reykjavík eru komnir í jólafrí en á Akureyri verður síðasta ganga fyrir jól þriðjudaginn 7. desember.

Byrjum líklega aftur um miðjan janúar . Fylgist með  facebook síðu Göngum samanog  þriðjudagshóp GS á facebook þegar nær dregur.

Þann 28. október sl. veitti Göngum saman rannsóknarstyrki til vísindamanna á sviði grunnrannsókna á brjóstakrabbameini. Alls námu styrkirnir í ár 10,5 milljónum króna. Þetta var í fjórtánda skipti sem Göngum saman veitir styrki og hefur þar með veitt alls nær 120 milljónum króna til brjóstakrabbameinsrannsókna.

Fjórir aðilar fengu styrk að þessu sinni:

Dr. Kristinn Ragnar Óskarsson, nýdoktor við Raunvísindastofnun Háskóla Íslands, hlaut 3 milljónir króna til verkefnisins „Skoðun á breytingu í bindingu krabbameinsvaldandi stökkbrigða af FoxA1 við litnisagnir“

María Rose Bustos, meistaranemi í líf- og læknavísindum við Háskóla Íslands hlaut 2,7 milljónir króna til verkefnisins „Brjóstaæxli BRCA2999Δ5 arfbera“

Snædís Ragnarsdóttir, doktorsnemi í líf- og læknavísindum við Háskóla Íslands hlaut 2,3 milljónir króna til verkefnisins „BRCA2 stökkbreyting, tap á villigerðarsamsætu og meðferð“

Dr. Snævar Sigurðsson, rannsóknasérfræðingur við Lífvísindasetur Háskóla Íslands hlaut 2,5 milljónir króna til verkefnisins „Heildstæð úttekt á gena og prótín tjáningu í brjóstastofnfrumulínu D492 í tvívíðri og þrívíðri rækt og í myndun greinóttra formgerðar og bandvefsumbreytingu“

Styrkveitingin fór fram í Hannesarholti og söng tónlistarkonan Ingibjörg Steingrímsdóttir nokkur lög við það tækifæri.

Í Reykjavík er gengið á mánudögum kl. 20.00. Á facebook síðu Göngum saman má sjá hvaðan gengið er hverju sinni.

Í nóvember verður lagt upp frá Hallgrímskirkju.

Á Akureyri er gengið á þriðjudögum kl. 17. Fylgist með þriðjudagshóp GS á facebook til að fá nánari upplýsingar.

Frá stofnun Göngum saman árið 2007 höfum við veitt rúmlega 107 milljónum til grunnrannsókna á brjóstakrabbameini.

Við höldum ótrauð áfram, þökk sé öllum þeim sem hafa lagt söfnun okkar lið, og í ár verður 10,5 milljónum veitt til vísindamanna á Íslandi.

Styrkveitingin verður í Hannesarholti fimmtudaginn 28. október kl. 17.30 og eru allir velkomnir.