Margrét Baldursdóttir

Þann 11. október 2022 veitti Göngum saman 15 milljónum króna í rannsóknarstyrki til vísindamanna á sviði grunnrannsókna á brjóstakrabbameini. Styrkveitingin fór fram í Hannesarholti þar sem 24 félagar úr Fóstbræðrum glöddu viðstadda með söng sínum.

Fimm aðilar fengu styrk að þessu sinni:

Aldís María Antonsdóttir, meistaranemi í lífeindafræði við Háskóla Íslands hlaut 2,5 milljónir króna til verkefnisins „Hlutverk peroxidasin (PXDN) í meinvarpandi brjóstakrabbameini“.

Alexander Örn Kárason, meistaranemi í lífeindafræði við Háskóla Íslands hlaut 2,5 milljónir króna til verkefnisins „Óstöðugir telomerar í BRCA2 vanvirkum brjóstafrumulínum í tengslum við nýja marksækna meðferð gegn POLQ og RAD522“.

Berglind Eva Benediktsdóttir, dósent í lyfjafræði við Háskóla Íslands hlaut 2,5 milljónir króna til verkefnisins „Sérhannaðar utanfumubólur með sækni gegn þríneikvæðum brjóstakrabbameinum“.

Kristrún Ýr Holm, doktorsnemi í heilbrigðisvísindum við Háskóla Íslands, hlaut 4 milljónir króna til verkefnisins „Leit að lífmerkjum fyrir snemmgreiningu brjóstakrabbameina“.

María Rose Bustos, rannsóknamaður við Háskóla Íslands, hlaut 3,5 milljónir króna til verkefnisins „Tap á arfblendni og tjáning estrógen viðtaka í brjóstakrabbameinum BRCA2999Δ5 arfbera“.

Árleg styrkveiting Göngum saman verður þriðjudaginn 11. október í Hannesarholti og hefst kl. 17.

Veittar verða 15 milljónir til grunnrannsókna á brjóstakrabbameini á Íslandi.

Göngum saman þakkar öllum þeim sem hafa lagt söfnuninni lið og býður velunnurum að njóta uppskerunnar í Hannesarholti.

Umsækjendur um rannsóknarstyrki Göngum saman munu kynna verkefni sín miðvikudaginn 5. október kl. 17 – 18.30

Kynningarnar fara fram í stofu HT-300 á Háskólatorgi Háskóla Íslands. HT-300 er á þriðju hæð, gengið upp stiga við Bóksölu stúdenta.

Félagar eru hvattir til að mæta.

Göngum saman á 15 ára afmæli um þessar mundir og því fögnum við  með hátíð í Nauthól föstudagskvöldið 14. október.  Einungis 100 miðar í boði.

Í Reykjavík er gengið á mánudögum kl. 20.00. Á facebook síðu Göngum saman má sjá hvaðan gengið er hverju sinni en við byrjum í Laugardalnum. Hittumst við innganginn í gömlu stúkuna.

Á Akureyri er gengið á þriðjudögum kl. 17. Fylgist með þriðjudagshóp GS á facebook til að fá nánari upplýsingar.

Kærar þakkir til allra sem hlupu fyrir Göngum saman í Reykjavíkurmaraþoninu og ekki síður til þeirra sem hétu á hlauparana okkar.

32 hlupu fyrir félagið og samtals söfnuðu þau tæplega 2,5 milljónum í styrktarsjóðinn.

Hvatningastaður Göngum saman í Reykjavíkurmaraþoninu verður eins og undanfarin ár á horninu á Lynghaga og Ægissíðu. Takið daginn snemma og komið að hvetja hlauparana okkar. Takið með ykkur eitthvað sem heyrist í, potta, sleifar, hrossabresti.

Fyrstu hlauparar leggja af stað frá Lækjargötunni kl. 8.40 og verða komnir á Ægissíðuna nokkrum mínútum síðar.

Svo má ekki gleyma að heita á þetta góða fólk á hlaupastyrkur.is

Reykjavíkurmaraþon Íslandsbanka 2022 fer fram laugardaginn 20. ágúst.

Þátttakendur geta valið á milli fimm vegalengda sem henta fyrir alla aldurshópa og fjölbreytt getustig:

• Maraþon (42,2 km)
• Hálfmaraþon (21,1 km)
• 10 km hlaup
• Skemmtiskokk – 3 km og möguleiki á að stytta sér leið (1,7 km)

Við hvetjum velunnara Göngum saman til að taka þátt og safna áheitum fyrir styrktarsjóðinn.

Skráning á Reykjavíkurmaraþon Íslandsbanka

Áheitasöfnun hlauparanna okkar fer fram á hlaupastyrkur.is

Stjórn Göngum saman auglýsir eftir umsóknum um styrki til grunnrannsókna á
brjóstakrabbameini. Áætlað er að veita allt að 15 milljónum króna í styrki á árinu 2022.

Vísindamenn og nemendur í rannsóknatengdu framhaldsnámi við íslenska háskóla og
rannsóknastofnanir geta sótt um styrk. Skilyrði er að verkefnið flokkist sem grunnrannsóknir á
brjóstakrabbameini. Ekki er veittur styrkur til tækjakaupa né til ferðalaga.

Umsóknareyðublað og almennar upplýsingar um útfyllingu umsóknar má nálgast hér á hér á heimasíðunni.

Umsókn skal senda á netfangið styrkir@gongumsaman.is fyrir lok dags mánudagsins 5. september
2022. Ekki er tekið við síðbúnum umsóknum.

Styrkir eru veittir skv. áherslum félagsins og á grundvelli faglegs mats á gæðum rannsóknarverkefna.
Göngum saman getur óskað eftir frekari upplýsingum og/eða farið fram á að umsækjendur kynni
verkefni sín áður en endanleg ákvörðun um styrkveitingu er tekin. Stjórn Göngum saman áskilur sér
rétt til að ákveða skiptingu styrkja, sem og að hafna öllum umsóknum.

Úthlutun styrkja fer fram í október en sá mánuður er helgaður baráttunni gegn brjóstakrabbameini

Aðalfundur Göngum saman 2022 verður haldinn á fjarfundaformi mánudaginn 30. maí kl. 17:30.

Dagskrá:

1. Stjórn félagsins gerir grein fyrir störfum félagsins.
2. Stjórn leggur fram endurskoðaða reikninga félagsins.
3. Kosning stjórnar og varastjórnar.
4. Kosning tveggja skoðunarmanna og tveggja til vara.
5. Ákvörðun árgjalds.
6. Önnur mál.

Félagar eru eindregið hvattir til að taka þátt á fundinum með því að velja þessa  slóð á zoom.