Fréttir

Kæru þátttakendur í maraþoninu á laugardaginn.

Við höfum nú sent þeim sem við erum með heimilisföng hjá buff/höfuðklút sem JÖR hannaði fyrir Göngum saman í ár. Því miður erum við ekki með heimilisföng hjá öllum og þeir sem ekki hafa fengið buff sent heim mega gjarnan hafa samband við Ellu í síma 897 7409 eða Gunnhildi í síma 695 5446.

Eins og í fyrra ætlum við sem tökum þátt í maraþoninu fyrir Göngum saman að hittast eftir hlaupið í Hannesarholti, Grundarstíg 9 og fá okkur súpu.

Kær kveðja og gangi ykkur vel !!

Göngum saman verður með hvatningalið á horninu á Lynghaga og Ægissíðu eins og undanfarin ár frá klukkan 8:40 en fyrstu hlaupararnir leggja þá af stað frá Lækjartorgi.

Komið og hvetjið okkar fólk. Takið með ykkur hluti sem heyrist í s.s. hrossabresti og eldhúsáhöld … því fleiri sem koma og hvetja þátttakendur því skemmtilegra!

Áheitasöfnun er enn í fullum gangi. Látum gott af okkur leiða og heitum á þetta flotta fólk, sjá

 http://www.hlaupastyrkur.is/godgerdafelog/felag/650907-1750

Nú þegar hafa margir sýnt stuðning í verki við Göngum saman í tengslum við Reykjavíkurmaraþon Íslandsbanka sem haldið verður í Reykjavík 22. ágúst n.k. og 56 hafa skráð sig til þátttöku í maraþoninu fyrir félagið. Takk fyrir allir saman!

Nú eru aðeins nokkrir dagar eru til stefnu og við hvetjum alla til að taka höndum saman og styrkja félagið enn frekar með því að heita á hlauparana og hvetja þá þannig áfram. Hér má sjá lista yfir þá sem hlaupa fyrir Göngum saman og þar eru leiðbeiningar um hvernig unnt er að heita á hlaupara.

Um helgina munu Golden Wings sem eru vinkonur og velunnarar Göngum saman ásamt samstarfsfólki sínu hjá Icelandair Group ganga á Bláfell á Kili. Gangan er m.a. styrktarganga og mun ágóði hennar renna til Göngum saman en þetta er í fimmta sinn sem afrakstur göngunnar rennur til félagsins. Við þökkum innilega fyrr þetta frábæra framtak og óskum þeim góðrar ferðar.

Kæru þátttakendur í Reykjavíkurmaraþoninu fyrir Göngum saman.

Kærar þakkir fyrir að leggja okkar mikilvæga málefni lið!

Við hvetjum ykkur til að safna áheitum á hlaupastykur.is og  benda velunnurum ykkar á http://www.hlaupastyrkur.is/godgerdafelog/felag/650907-1750

Félagið verður með hvatningastöð á horninu á Lynghaga og Ægissíðu og eru velunnarar hvattir til að mæta á staðinn og hvetja hlaupara.

Nú styttist í maraþonið. Við hvetjum okkar þátttakendur til að safna áheitum á hlaupastykur.is og einnig hvetjum við alla sem sjá sér fært að leggja okkur lið með því að heita á hlauparana okkar sjá http://www.hlaupastyrkur.is/godgerdafelog/felag/650907-1750

Göngum saman auglýsir eftir umsóknum um styrki til grunnrannsókna á brjósta-krabbameini.  Áætlað er að veita allt að 10 milljónum í styrki á árinu 2015.

Vísindamenn og nemendur í rannsóknatengdu framhaldsnámi (meistara- eða doktorsnámi) við háskóla og rannsóknastofnanir geta sótt um styrk.

Skilyrði er að verkefnið flokkist sem grunnrannsóknir á brjóstakrabbameini. Ekki er veittur styrkur til tækjakaupa

 msóknum skal skilað á sérstöku umsóknareyðublaði sjá hér: gs_styrkumsokn_2015.doc fyrir 1. september nk. á netfangið styrkir@gongumsaman.is merkt -Styrkumsókn 2015

Styrkurinn verður veittur í október, en októbermánuður er helgaður baráttunni gegn brjóstakrabbameini.

Sjá einnig auglýsingu: auglysing-styrkur2015.doc

Landssamband bakarameistara, LABAK, veitti í vikunni Göngum saman 1.5 milljónir króna í styrk vegna sölu á brjóstabollunni sem í ár var gómsæt rjómabolla með berjafyllingu. Þetta er í fimmta sinn sem Landssamband bakarameistara styrkir Göngum saman með þessum hætti og hafa hingað til alls safnast rúmlega sjö milljónir króna sem hafa runnið óskiptar til grunnrannsókna á brjóstakrabbameini.

Göngum saman þakkar LABAK innilega fyrir þennan ómetanlega styrk og fyrir frábært samstarf.

Frá vinstri: Ragnheiður Héðinsdóttir, Samtökum iðnaðarins og stjórnarmenn LABAK: Sigurður Enoksson, Hérastubbi bakara, Sigurður M. Guðjónsson, Bernhöftsbakaríi, Jón Þór Lúðvíksson, Brauðgerð Ólafsvíkur, Jón Albert Kristinsson, formaður, Björnsbakaríi, Jón Heiðar Ríkharðsson, Okkar bakaríi og Steinþór Jónsson, Björnsbakaríi, Gunnhildur Óskarsdóttir formaður Göngum saman og Ragnhildur Zoëga stjórnarkona í Göngum saman.

Þann 5.júní s.l. fór fram áheitahlaup Lindaskóla sem kallað var Lindaskólasprettur. Þetta er í fyrsta skipti sem hlaupið er framkvæmt með þessum hætti og var ákveðið að styrkja Göngum saman með þeim áheitum sem söfnuðust. Hlaupið er fyrir nemendur 1.-7.bekkja. Einnig hlupu nokkrir starfsmenn skólans og hét starfsmannafélag Lindaskóla á þá hlaupara.

Alls söfnuðust kr. 155.000.- og sú upphæð rennur beint til Göngum saman! Margrét Ásgeirsdóttir tók við skjali á skólaslitum fyrir hönd Göngum saman og sagði við það tækifæri lítillega frá sögu og tilgangi félagsins.Göngum saman þakkar innilega fyrir þennan frábæra stuðning.

Hátt í tvö þúsund manns gengu með Göngum saman í mæðradagsgöngunni, þar af um þúsund manns í Reykjavík. Göngufólk var á öllum aldri og það ríkti mikil gleði í göngunni.

Félagið vil þakka öllum þeim fjölmörgu um land allt sem lögðu mikið á sig við undirbúning göngunnar til að tryggja að allt gengi vel. Í Reykjavík voru styrkþegar mættir á Háskólatorg og gafst gestum tækifæri til að spyrja þau út í rannsóknir þeirra. Þetta var skemmtileg nýjung sem fólk kunni vel að meta og þökkum við styrkþegunum kærlega fyrir.

Nýju bolirnir og hálsklútarnir sem JÖR hannaði fyrir félagið seldust mjög vel og þökkum við góðar viðtökur. Fyrir þá sem komust ekki í dag er enn hægt að fá þá næstu 10 dagana hjá JÖR á Laugavegi 89 í Reykjavík.

Göngum saman treystir á stuðning hönnuða, fyrirtækja og almennings – félaginu hefur alls staðar verið tekið vel og þökkum við öllum stuðninginn, annars væri þetta ekki hægt. TAKK.

Gangan að hefjast við Háskólatorg í Reykjavík

Göngufólk í Vestmannaeyjum

Göngufólk á Egilsstöðum