a8

Krabbameinsfélag Ísland hélt örráðstefnu í dag – Að greinast aftur og aftur og aftur… Meðal fyrirlestra ráðstefnunnar var Gunnhildur Óskarsdóttir formaður Göngum saman sem sagði frá reynslu sinni. Fjallað var um ráðstefnuna í 10 fréttum sjónvarpsins í kvöld og var m.a. viðtal við Gunnhildi.

dagskra.ruv.is/sjonvarpid/4547583/2011/04/18/

Aðalfundur Göngum saman var haldinn í gærkvöldi og var fundurinn vel sóttur. Á aðalfundinum kom vel fram hversu mikið óeigingjarnt starf félagsmenn hafa unnið fyrir félagið á árinu og þakkaði Gunnhildur Óskarsdóttir formaður félagsins fyrir það.

Eftir venjuleg aðalfundarstörf tók Guðný Aradóttir göngustjóri félagsins til máls og afhenti Göngum saman 254 þúsund krónur í styrktarsjóðinn sem var afrakstur átaksins Í sömu skóm en Guðný gekk í skærbleikum uppreimuðum skóm í heilan mánuð og safnaði áheitum fyrir félagið.

Að lokum sagði Gunnhildur Óskarsdóttir formaður frá stefnumótunarvinnu félagsins undanfarna mánuði og kynnti framtíðarsýn félagsins.

Vegna aðalfundur Göngum saman verður ekki gengið í Reykjavík í kvöld. Gengið næst frá World Class í Laugardalnum 18. ágúst. Aðalfundurinn í kvöld verður í sal Ráðgjafarþjónustu Krabbameinsfélags Íslands, Skógarhlíð 8 og hefst hann kl. 20. Félagar eru eindregið hvattir til að mæta á fundinn. Niðurstöður stefnumótunarvinnu félagsins verða kynntar.

Dagskrá.

1. Stjórn félagsins gerir grein fyrir störfum félagsins.

2. Stjórn leggur fram endurskoðaða reikninga félagsins.

3. Kosning stjórnar og varastjórnar.

4. Kosning tveggja skoðunarmanna og tveggja til vara.

5. Ákvörðun árgjalds.

6. Önnur mál.

Allir félagar velkomnir..

Aðalfundur Göngum saman verður haldinn mánudaginn 11. apríl kl. 20:00 í sal Ráðgjafarþjónustu Krabbameinsfélags Íslands. Félagar eru eindregið hvattir til að mæta á fundinn.

Dagskrá.

1. Stjórn félagsins gerir grein fyrir störfum félagsins.

2. Stjórn leggur fram endurskoðaða reikninga félagsins.

3. Kosning stjórnar og varastjórnar.

4. Kosning tveggja skoðunarmanna og tveggja til vara.

5. Ákvörðun árgjalds.

6. Önnur mál.

Aðalfundur Göngum saman verður haldinn mánudaginn 11. apríl n.k. kl. 20 í sal Ráðgjafaþjónustu Krabbameinsfélagsins, Skógarhlíð 8. Dagskrá fundarins verður auglýst síðar.

Á Dalvík verður gengið á þriðjudögum klukkan 16:30 í Menningarhúsinu Bergi. Gengið er rösklega í 30-40 mínútur, eftir veðri og vindum. Að göngu lokinni er gjarnan komið við og drukkinn kaffisopi í Bergi, eða kíkt aðeins á Bókasafnið.

Göngum saman óskar félögum og velunnurum gleðilegs árs og þakkar stuðninginn á árinu sem var að líða. Fyrsta ganga ársins 2011 verður í Reykjavík mánudaginn 10. janúar kl. 20 frá Fríkirkjunni í Lækjargötu.

Tilkynnt verður þegar göngur á Akureyri og á Dalvík hefjast.

Á morgun föstudag hefst sala á Marimekko töskum sem framleiddar eru fyrir Avon snyrtivörufyrirtækið til styrktar rannsóknum á brjóstakrabbameini. Hver taska kostar 3.995 krónur og af því renna 1.500 krónur til styrktarsjóðs Göngum saman. Einungis seldar í Avon búðinni í Smáralind.

Góð jólagjöf á góðu verði til styrktar góðu málefni.

S.l. laugardagskvöld fór fram í fyrsta skipti Brjóstaballið á vegum Göngum saman. Ballið tókst í alla staði mjög vel og það ríkti mikil gleði og stemming í skreyttum sal Iðnó. Melchior hóf kvöldið með ljúfum tónum og síðan tók hljómsveitin 5 á Richter við og hélt dönsurum við efnið. Andrea Jónsdóttir kláraði síðan kvöldið með góðri tónlist sem fólk dansaði við inn í nóttina.

Göngum saman þakkar öllum sem komu að skipulagi og framkvæmd Brjóstaballsins. Sérstakar þakkir til tónlistafólksins, Andreu og aðstandenda Iðnó fyrir að gera félaginu mögulegt að bjóða upp á þessa nýjung í starfinu.

Í dag miðvikudaginn 27. október veitti félagið íslenskum rannsóknaraðilum á sviði grunnrannsókna á brjóstakrabbameini rannsóknarstyrki að fjárhæð kr. 5 milljónir.

Þetta er í fjórða sinn sem félagið veitir styrki og með þessari styrkveitingu hefur Göngum saman úthlutað alls 17 milljónum króna til grunnrannsókna á brjóstakrabbameini á þremur árum.

Styrkurinn í ár er veittur í minningu um Kristbjörgu Marteinsdóttur en hún lést af völdum brjóstakrabbameins 11. nóvember í fyrra tæplega 45 ára gömul.

Styrkurinn skiptist á milli fjögurra aðila:
• Bylgja Hilmarsdóttir, doktorsnemi fyrir verkefnið: Hlutverk PTP1B í stofnfrumum brjóstkirtils.

• Guðrún Birna Jónsdóttir, meistaranemi fyrir verkefnið: Örflögugreining á æxlismerkjum sem tengjast sjúkdómshorfum í brjóstakrabbameini.

• Dr. Helgi Sigurðsson, prófessor og yfirlæknir á Landspítala-háskólasjúkrahúsi fyrir verkefnið: Lyfjanæmispróf á brjóstakrabbameinsfrumum.

• Dr. Rósa Björk Barkardóttir klínískur prófessor á Landspítala-háskólasjúkrahúsi fyrir verkefnið Stökkbreytileit á völdum litningasvæðum í fjölskyldum með háa tíðni krabbameins í brjóstum.