Monthly Archives

maí 2012

Tveir piltar kynntu Göngum saman í skólanum

Eftir Fréttir

Gögnum saman fer víða. Það er gaman að segja frá því að tveir piltar í 10. bekk í Lindaskóla í Kópavogi völdu sér það verkefni í þjóðfélagsfræði að segja frá styrktarfélaginu Göngum saman. Þeir heita Eiríkur Orri Agnarsson og Ísak Freyr Hilmarsson. Strákarnir útbjuggu verkefnið á Prezi.com og þar settu þeir fram ýmsan fróðleik um félagið. Meðal annars tóku þeir viðtal við formann Göngum saman, Gunnhildi Óskarsdóttur. Hægt er að sjá verkefnið þeirra hér.

Þegar Eiríkur Orri og Ísak Freyr kynntu verkefnið í skólanum klæddust þeir nýju bolunum sem Mundi hannaði.

Göngum saman um allt land á mæðradaginn 13. maí kl. 11

Eftir Fréttir

Á mæðradaginn verður styrktarganga Göngum saman um allt land kl. 11:00

Gengið verður á 13 stöðum hringinn í kringum landið. Nýjir staðir hafa bæst við frá í fyrra, t.d. Stórutjarnaskóli og Reykjanesbær.

Göngustaðir í ár:

  • Reykjavík – við Skautahöllina í Laugardal
  • Akranes – gengið frá sundlauginni á Jaðarsbökkum; tvær vegalendir, 3 og 5 km
  • Borgarnes – pílagrímsganga frá Borg á Mýrum að Borgarneskirkju
  • Stykkishólmur – frá sundlauginni; 5 km; frítt í sund á eftir
  • Patreksfjörður – frá íþróttahúsinu Bröttuhlíð; tvær vegalendir, 3 og 5 km
  • Ísafjörður – frá gamla sjúkrahúsinu; tvær vegalendir, 3 og 7 km
  • Akureyri – frá Lystigarðinum; tvær vegalengdir í boði
  • Stórutjarnaskóli – gengið um hólana í kringum skólann; íslensk kjötsúpu á eftir; frítt í sund
  • Egilsstaðir – frá bílastæðinu við Selskóg; frítt í sund á eftir
  • Reyðarfjörður – frá Stríðsárasafninu; frítt í sund á Eskifirði á eftir
  • Höfn – frá sundlauginni; tvær vegalendir, 3 og 7 km; frítt í sund á eftir
  • Hveragerði – frá sundlauginni í Laugaskarði; frítt í sund á eftir
  • Reykjanesbær – frá Íþróttaakademíunni; tvær vegalengdir, rúmir 2 og 5 km

Frítt er í göngurnar en það verður tekið á móti frjálsum framlögum. Þá verður ýmis varningur sem framleiddur hefur verið fyrir Göngum saman til sölu á göngustöðunum, m.a. ný buff og bolir sem hönnuðurinn Mundi hannaði fyrir félagið í tilefni 5 ára afmælisins.

Göngum saman nýtur aftur í ár góðs af samstarfi við Landssamband bakarameistara sem stendur fyrir sölu á brjóstabollum í bakaríum um allt land dagana 10 – 13. maí í tengslum við mæðradaginn. Landsmenn eru hvattir til að bjóða upp á brjóstabollur með kaffinu alla mæðradagshelgina og láta þannig gott af sér leiða, brjóstanna vegna.

Gleði á kynningunni í verslun Munda

Eftir Fréttir

Það var mikil gleði og stemming í versluninni hjá Munda í gær þegar nýju bolirnir og buffin sem Mundi hannaði fyrir Göngum saman voru kynnt. Hljómsveitin Gleðisveit Lýðveldisins gladdi viðstadda með skemmtilegri tónlist og buddur sáust á lofti. Hægt verður að kaupa boli og buff í versluninni á Laugavegi 37 til 13. maí auk þess sem þau verða seld í göngum félagsins víða um land á mæðradaginn (sunnudaginn 13. maí), sjá staðsetningar í viðburðadagatalinu.

Mundi segir frá verkefninu í viðtali við Monitor sem kom út í morgun, sjá hér.

Göngum saman til Munda á Laugaveg 37 í dag

Eftir Fréttir

Hönnuðurinn Mundi hefur hannað bol og buff fyrir styrktarfélagið Göngum saman. Bolirnir og buffin verða kynnt í verslun Munda að Laugavegi 37 miðvikudaginn 2. maí milli 17 og 19. Í framhaldinu verða þeir til sölu hjá Munda og á vegum Göngum saman í viðburðum á vegum félagsins.

Mundi er vörumerki hönnuðarins Guðmundar Hallgrímssonar sem hann stofnaði árið 2007, þá tæplega tvítugur að aldri. Hann fékk inngöngu í hönnunardeild Listaháskóla Íslands ungur að árum og hefur þrátt fyrir að vera aðeins 24 ára gamall skapað sér nafn sem hönnuður listamaður í fremstu röð og hafa verk hans vakið athygli víða um heim.

Allir velkomnir.