a8

Fjórða og síðasta prjónakaffið á vegum Göngum saman og Fjallaverksmiðju Íslands var í dag í Hannesarholti. Um fimmtíu konur komu og prjónuðu lopabrjóstahúfur, settu fóður inn í húfurnar, spjölluðu, fengu sér veitingar í Borðstofunni í Hannesarholti og nutu samveru. Alls hafa um hundrað konur prjónað um 250 húfur sem seldar verða á sérstakri húfu uppskeruhátíð í Hannesarholti, Grundarstíg 10, Reykjavík, laugardaginn 9. nóvember k. 15 – 17. Göngum saman þakkar prjónakonunum fyrir einstaka samveru og framlag, Ístex fyrir allan lopann, Hannesarholti fyrir að bjóða okkur velkomin í þetta fallega hús.  Kristín Helga og Fjallaverksmiðja Íslands fá stórt TAKK fyrir frábært samstarf og frumkvæðið að þessu skemmtilega og gefandi verkefni. Hver einasta króna fyrir þetta verkefni fer beint í styrktarsjóðinn og eru félagar og velunnarar hvattir til að mæta í Hannesarholt þann 9. nóvember og tryggja sér húfu. Fyrstir koma fyrstir fá!

Göngum saman fékk 1.822.163 kr í áheit og var í 8. sæti af 148 góðgerðafélögum en þetta kom fram í áheitaskýrslunni sem afhent var í Íslandsbanka í gær. Frábær árangur og við þökkum enn og aftur öllum þátttakendum og þeim sem hétu á þá.

Í dag, á styrkveitingardegi Göngum saman, ákvað stjórn Johan Rönning hf að veita Göngum saman eina milljón króna í styrktarsjóð félagsins í tilefni af 80 ára afmæli fyrirtækisins.

Göngum saman þakkar innilega fyrir þessa höfðinglegu gjöf.

Þess má geta að Johan Rönning hf veitti félaginu einngi einnar milljón króna styrk en  fyrir fimm árum í tilefni af 75 ára afmæli fyrirtækisins.

Í dag 10. október 2013 veitti Göngum saman íslenskum rannsóknaraðilum á sviði grunnrannsókna á brjóstakrabbameini rannsóknarstyrki að fjárhæð kr. 8 milljónir króna. Með þessari styrkveitingu hefur Göngum saman úthlutað alls rúmum 40 milljónum króna til grunnrannsókna á brjóstakrabbameini á sex árum. Félagar úr Karlakórnum Fóstbræðrum undir stjórn Árna Harðarsonar glöddu viðstadda með söng sínum.

Styrkurinn í ár skiptist á milli sex aðila:

·         Anna Marzellíusardóttir. Leit að áhrifabreytingum í erfðaefni fjölskyldna með háa tíðni brjóstakrabbameins.

·         Birna Þorvaldsdóttir. Hefur telomer-lengd í blóði forspárgildi um brjóstakrabbameinsáhættu hjá BRCA2 arfberum?   

·         Edda Sigríður Freysteinsdóttir. Leit að brjóstakrabbameinsgenum í fjölskyldum án BRCA1/2 tengsla.     

·         Inga Reynisdóttir: Leit að samrunagenum í brjóstaæxlum sem bera mögnuð litningasvæði.   

Laufey Tryggvadóttir. Áhrif meðferðar og æxliseiginleika á horfur brjóstakrabbameinssjúklinga með BRCA2 stökkbreytingar.  (Kristín Alexíusdóttir tók við styrknum fyrir hönd Laufeyjar).

·         Sigríður Þóra Reynisdóttir. miRNA tjáning í BRCA2-tengdu brjóstakrabbameini.

Frábær stemning var í Hannesarholti s.l. miðvikudag þar sem hátt í 50 konur á öllum aldri mættu og prjónuðu saman fjallkonubrjóst! Næsta miðvikudag höldum við áfram. Húfurnar verða síðan seldar til styrktar Göngum saman.

Miðvikudagana 2.  9. 16. og 23. október kl. 16:00 – 18:00 stendur Göngum saman fyrir prjónakaffi í Hannesarholti, Grundarstíg 10, Reykjavík. Þar gefst félögum og öðrum velunnurum tækifæri á að hittast og prjóna saman húfur til styrktar Göngum saman. 

Fjallaverksmiðja Íslands (https://www.facebook.com/IcelandMountainFactory) leggur til hönnun og verksmiðjustúlkur aðstoða og mæta með uppskriftir. Ístex styrkir verkefnið með lopa en prjónendur þurfa að taka með sér 40 cm. hringprjóna nr. 4-5 og sokkaprjóna.

Fjallkonubrjóstin verða svo seld og fer allur ágóðinn í styrktarsjóðinn.

Hvetjum ykkur til að koma og prjóna með okkur Fjallkonubrjóst!

Rannsóknastyrkjum verður úthlutað úr styrktarsjóði Göngum saman í sjöunda sinn í október n.k. og er áætlað að úthluta allt að 8 milljónum króna.

Auglýst er eftir umsóknum og rennur fresturinn út 1. september 2013. Umsóknum skal skilað á sérstöku umsóknareyðublaði sem er að finna hér á heimasíðu félagsins: styrkumsokn_gongumsaman_2013.doc

Umsókn skal senda sem viðhengi á netfangið styrkir hjá gongumsaman.is merkt – Styrkumsókn 2013 -.

Sjötíu og fjórir tóku þátt í Reykjavíkurmaraþoninu fyrir Göngum saman. Áheitasöfnun hefur gengið mjög vel en hægt er að heita á hlaupara til mánudags og því er ekki ennþá komin endanleg tala yfir það hversu mikið safnaðist.

Göngum saman þakkar innilega öllum hlaupurum yfir þátttökuna og einnig öllum þeim sem hétu á þá. Hvatningaliðinu á horninu á Ægissíðu og Lynghaga er þakkað fyrir hvatninguna og einnig öllum öðrum sem hafa hvatt hlauparana til dáða. Stuðningur ykkar allra er ómetanlegur.

Kæri hlaupari
Við viljum byrja á að þakka þér fyrir stuðninginn við Göngum saman. Félagið hefur notið góðs af hlaupastyrkjum í Reykjavíkurmaraþoni undanfarin ár en á síðasta ári söfnuðust 1.017.065 krónur til styrktar grunnrannsóknum á brjóstakrabbameini. Nú þegar aðeins einn dagur er til stefnu hafa 64 hlauparar skráð sig til að hlaupa fyrir félagið og tvö fjögurra manna boðhlaupslið og nú þegar hafa 922 þúsund krónur hafa safnast í áheit.

Síðustu daga höfum við farið með bleik buff til þeirra sem ætla að hlaupa til styrktar Göngum saman. Því miður höfum við ekki heimilisföng hjá öllum og ekki heldur netföng þannig að ekki hafa allir hlauparar fengið buffin sín. Endilega hafðu samband við Ellu í síma 897 7409 til að nálgast buffið þitt.

Við munum einnig vera með hvatningarlið á horni Ægissíðu og Lynghaga og lofum miklu stuði þegar við sjáum hlaupara með bleiku buffin. Endilega hvettu þitt fólk til að koma og hvetja okkur!

Öllum þeim sem taka þátt í maraþoninu fyrir Göngum saman er boðið í súpu í Hannesarholti, Grundarstíg 10, 101 Reykjavík frá 11:30 á laugardaginn. Vinsamlegast gefið ykkur fram við Ragnheiði Jónsdóttur, hún verður á staðnum.
Gangi þér vel!

Göngum saman

Það styttist í Reyjavíkurmaraþon Íslandsbanka sem fram fer á laugardaginn. Göngum saman á stóran hóp stuðningsfólks sem ætlar að hlaupa fyrir félagið – TAKK hlauparar.

Nú þegar eru rúmlega 60 hlauparar að safna fyrir félagið auk tveggja boðhlaupsliða og alls ætla þau að fara 965 km. Það er mjög mikilvægt fyrir félagið að finna fyrir þessum mikla stuðningi. Og margir leggja þeim lið með því að heita á þau. Þegar hefur nærri einni milljón verið heitið á hlauparana sem safna fyrir félagið og við hvetjum fólk til að gera enn betur. ÁFRAM hlauparar.

Eins og fyrri ár verður stuðningsmannalið frá Göngum saman á horni Lynghaga og Ægissíðu til að hvetja hlauparana.