a8

Dagatöl (á vegg) Göngum saman voru að koma út en þau byrja í maí 2009 og ná fram á vor 2010. Skemmtilegt dagatal sem er tilvalin gjöf til vina og vandamanna. Kostar 1000 krónur og það fer allt í styrktarsjóð Göngum saman.

Dagatölin verða til sölu í göngunni næsta mánudag en þá verður hist við Kjarvalsstaði kl. 20. Hvetjum einnig fólk til að taka nokkur dagatöl og selja, t.d. á vinnustað sínum.

Þriðjudaginn 19. maí verður byrjað að ganga í Kjarnaskógi. Mæting við Kjarnakot (snyrtihúsið) kl. 19:30 stundvíslega. Gengið er í u.þ.b. 1 klst.

Allir velkomnir
 

Það var mikil eftirvænting og skemmtileg stund í hátíðarsal Háteigsskóla í Reykjavík í fyrrakvöld þegar sýnd var heimildamynd sem 10 bekkingar höfðu gert um brjóstakrabbamein og styrktarfélagið Göngum saman. Myndin er eitt þeirra verkefna sem krakkarnir í félagsmiðstöðinni 105 hafa staðið fyrir í góðgerðarvikunni til styrktar Göngum saman.

Þessir krakkar geta allt – það var samróma álit þeirra sem voru við sýningu myndarinnar. Það eru Salvör Káradóttir, Inga Rán Reynisdóttir og Telma Ólafsdóttir sem eiga heiðurinn af gerð myndarinnar. Til hamingju stelpur, einstaklega vel að verki staðið og falleg nálgun. Helsti viðmælandi stelpnanna í myndinni var Gunnhildur Óskarsdóttir formaður Göngum saman en einnig töluðu þær við Friðbjörn Sigurðsson krabbameinslækni og nokkra félaga í Göngum saman.

Klukkan 11 í kvöld hófst íþróttamaraþon sem krakkarnir standa fyrir og mun það vera  í alla nótt. Krakkarnir hafa verið að safna áheitum vegna maraþonsins og renna þau óskipt í styrktarsjóð Göngum saman. Með krökkunum vaka þrír starfsmenn félagsmiðstöðvarinnar 105 og tveir foreldrar. Við óskum krökkunum góðs gengis og skemmtunar.

Á frumsýningu myndarinnar um brjóstakrabbamein og Göngum saman. Höfundar myndarinnar eru lengst til hægri á myndinni en með þeim eru m.a. Friðbjörn Sigurðsson læknir og Gunnhildur Óskarsdóttir formaður Göngum saman.

Rósa Björk Barkardóttir sameindalíffræðingur, einn af styrkþegum Göngum saman árið 2008, hefur verið valin heiðursvísindamaður Landspítalans 2009.

http://mbl.is/mm/frettir/innlent/2009/04/29/visindamenn_arsins_a_landspitala/

Göngum saman óskar henni til hamingju og óskar henni áframhaldandi velfarnaðar í starfi.

Vorið góða grænt og hlýtt læðir fjöri um Lystigarðinn … á Akureyri

Góð þátttaka var í vísindarölti um Lystigarðinn á Akureyri á mæðradaginn. Þar voru meðal annars konur frá Dalvík og Reykjavík. Nærri 40 manns röltu um garðinn undir leiðsögn Björgvins Steindórssonar forstöðumanns Lystigarðsins. Eftir gönguna fór hópurinn í stutta gönguferð í nágrenni garðsins.

Í máli Björgvins kom margt forvitnilegt fram um starfsemi og upphaf Lystigarðsins. Meðal annars það að árið 1909 fengu konur land undir lystigarð á Akureyri og í framhaldi af því ræktuðu þær og gróðursettu plöntur. Árið 1912 var garðurinn stofnaður. Það voru konur sem létu drauminn rætast!

Í Reykjavík hittust tæplega 300 manns við Skautahöllina, söng saman og gekk um Laugardalinn undir góðri stjórn Guðnýjar Aradóttur. Það var góð stemming og vor í loftinu.

Í Lystigarðinum á Akureyi á mæðradaginn

Soroptimistasamband Íslands heldur landsfund í Reykjavík um helgina og stefna soroptimistakonur að því að því að fjölmenna í vorgöngu Göngum saman í Laugardalnum á sunnudaginn.

Soroptomistaklúbbar Reykjavíkur og Hafnarfjarðar og Garðabæjar hafa veitt Göngum saman höfðinglegan styrk. Við þökkum þeim kærlega fyrir stuðninginn.

Framlag þeirra rennur óskipt í styrktarsjóð félagsins.

Vorið góða grænt og hlýtt
græðir fjör um (Laugar)dalinn …

Styrktarfélagið Göngum saman efnir til vorgöngu fyrir alla fjölskylduna á mæðradaginn sunnudaginn 10. maí. Lagt verður af stað frá Skautahöllinni kl. 11 og gengið um Laugardalinn í um það bil klukkustund.

Göngunni á mæðradaginn er ætlað að vekja athygli á Stóru styrktargöngu félagsins sem haldin verður í þriðja sinn 6. september næstkomandi. Þá verður gengið á nokkrum stöðum á landinu. Stóra styrktargangan er aðalfjáröflunarleið félagsins. Vorgangan 10. maí markar upphafið að undirbúningi fyrir Stóru styrktargönguna í haust en þá verða gengnar þrjár vegarlengdir, 3, 5 og 10 kílómetrar.

Ekkert þátttökugjald er í vorgönguna en frjáls framlög eru vel þegin. Einnig verður hægt að kaupa kort, boli og buff með merki félagsins. Andvirði sölunnar rennur óskipt í styrktarsjóð félagsins.

Göngum saman, fögnum vori og njótum samveru á mæðradaginn.

Allir velkomnir.

Vorið góða ljúft og hlýtt læðir fjöri um Lystigarðinn
 
Akureyrardeild Styrktarfélagsins Göngum saman efnir til vísindarölts fyrir alla fjölskylduna á mæðradaginn sunnudaginn 10. maí í Lystigarðinum. Mæting er við Eyrarlandsstofu í Lystigarðinum kl. 11:00 og rölt um garðinn.

Göngunni á mæðradaginn er ætlað að vekja athygli á Stóru styrktargöngu Göngum saman sem haldin verður í þriðja sinn 6. september næstkomandi. Þá verður gengið á nokkrum stöðum á landinu. Stóra styrktargangan er aðalfjáröflunarleið félagsins.

Vísindaröltið á mæðradaginn 10. maí markar upphafið að undirbúningi fyrir Stóru styrktargönguna í september. Á Akureyri er gengið á hverjum þriðjudegi kl. 19:30. Í sumar er gengið í Kjarnaskógi en meðan enn er blautt þar þá er gengið frá Íþróttahöllinni á sama tíma.

Ekkert þátttökugjald er í vísindaröltið en frjáls framlög eru vel þegin. Einnig verður hægt að kaupa gjafakort, boli og buff með merki félagsins. Andvirði sölunnar rennur óskipt í styrktarsjóð félagsins.

Allir hvattir til að mæta.

Krakkar úr félagsmiðstöðinni 105 í 10. bekk Háteigsskóla eru með kökubasar til styrktar Göngum saman í Garðheimum í Mjódd frá klukkan 11.00-15.00 laugardaginn 2. maí n.k. Kökubasarinn er einn þáttur í góðgerðarviku sem krakkarnir eru að skipuleggja og helguð er Göngum saman.

Einnig eru þau að vinna að heimildarmynd um Göngum saman og brjóstakrabbamein sem verður frumsýnd í Háteigsskóla 13.maí 2009, tími auglýstur síðar allir velkomnir.Krakkarnir selja einnig boli sem Naked ape hefur hannað fyrir þau og rennur öll sala á bolunum til Göngum saman. 

Við hvetjum félaga og aðra velunnara að koma í Garðheima n.k. laugardag og styrkja þetta frábæra framtak krakkanna.

Vorganga Göngum saman verður haldin í Laugardalnum í Reykjavík á mæðradaginn, sunnudaginn 10. maí kl. 11:00. Gengið verður frá Skautahöllinni.

Göngum saman, fögnum vori og njótum samveru.