Fréttir

Við upphaf göngu um Öskjuhlíðina í kvöld afhenti Hlín Reykdal hönnuður Göngum saman eina milljón króna í styrktarsjóð félagsins. Fjárhæðin er afrakstur sölu af armböndunum fallegu sem Hlín hannaði fyrir Göngum saman og voru seld í apríl s.l.

Göngum saman færir Hlín innilegar þakkir fyrir þetta frábæra framlag og fyrir mjög ánægjulega samvinnu.

Á myndinni eru Ragnhildur Vigfúsdóttir, Hlín Reykdal og Gunnhildur Óskarsdóttir, formaður Göngum saman

Í tilefni fimm ára afmælis Göngum saman hefur Guðný Aradóttir stafgönguþjálfari og einn stofnfélaga Göngum saman ákveðið að ganga frá Þingvöllum til Reykjavíkur að næturlagi þann 15 júní n.k.. Þetta verður ca. 63 km styrktarganga og og lagt af stað frá Vinaskógi á Þingvöllum kl. 20:00, gengin svokölluð Nesjavallaleið og endað við World Class Laugum. Áætlaður tími er 10 klukkustundir plús. Rúta fer frá World Class, Laugum kl. 19:00. Þeir sem vilja fá far með rútunni vinsamlegast látið Guðnýju vita fyrir miðvikudaginn á feisbook eða í tölvupósti. 

Það er hverjum og einum frjálst að ganga þá vegalengd sem hann treystir sé til. Bíll mun fylgja göngunni allan tímann sem hægt verður að setjast upp í og hvíla sig í einhvern tíma og sameinast svo göngunni aftur. Eins verða vatnsbyrgðir með í för til að fylla á brúsa.

Það verður hægt að heita á Guðnýju og alla þá sem taka þátt í göngunni með henni, þátttökugjald í gönguna verður 100 kr á hvern genginn kílómeter.

Upplýsingar um áheitareikninginn 372-13-304102 ktl. 650907-1750. Vinsamlegast sendið tilkynningu um greiðslu á: gudny@stafganga.is

Búið er að útbúa viðburð um gönguna á Facebook og er fólk hvatt til að fylgjast með þar. Guðný mun pósta nánari upplýsingum um gönguna þar þegar nær dregur. Guðný skorar á alla að ganga með sér þessa skemmtilegu leið. Þá er hægt að skrá sig í viðburðinn á FB eða senda Guðnýju póst á gudny@stafganga.is til að fá nánari upplýsingar og skrá sig í gönguna.

Næsta mánudagsganga í Reykjavík verður mánudaginn 4. júní n.k. Gengið frá Perlunni kl.20:00

Allir velkomnir

Jóhannes Felixson formaður Landssambands bakarameistara (LABAK)  afhenti Gunnhildi Óskarsdóttur, formanni Göngum saman, 1.500.000 kr. í styrktarsjóð félagsins í gær en LABAK, stóð fyrir sölu á brjóstabollum í bakaríum um allt land dagana 10 – 13. maí til stuðnings félaginu. Fyrirtæki, stofnanir og einstaklingar brugðust vel við og buðu upp á brjóstabollur með kaffinu mæðradagshelgina. Göngum saman þakkar LABAK innilega fyrir samstarfið og stuðninginn og öllum þeim sem keyptu brjóstabolluna.

Hún var falleg opnuauglýsingin í Fréttablaðið um síðustu helgi sem vakti athygli á Mæðradagsgöngu Göngum saman um allt land og brjóstabollunni sem bakarar buðu upp á um mæðradagshelgina til styrktar félaginu. Þökk sé fjölmörgum fyrirtækjum sem styrktu félagið til að auglýsa viðburði helgarinnar, með opnunni og í skjáauglýsingum sjónvarpsins. Án þessara sérstöku auglýsingastyrkja hefði ekki verið mögulegt að vekja sömu athygli á göngunni því það er ófrávíkjanleg regla Göngum saman að það sem safnast í viðburðum og öðrum verkefnum félagsins fer allt í styrktarsjóðinn og nýtist þannig til grunnrannsókna á brjóstakrabbameini.

Allt starf félagsins er unnið í sjálfboðaliðavinnu og við eigum marga góða stuðningsmenn sem leggja Göngum saman lið. Í ár fengum við fríðan hóp karla og kvenna til að sitja fyrir hjá Báru ljósmyndara í fallegu bolunum hans Munda sem hann hannaði fyrir félagið í tilefni af 5 ára afmæli þess. Auglýsingar félagsins gerði Ólafur Haraldsson grafískur hönnuður. Göngum saman þakkar öllu þessu góða fólki og öðrum sem hafa gengið saman með félaginu í verkefnum þess.

Í gær á mæðradaginn var í fyrsta sinn gengið í Reykjanesbæ undir merki Göngum saman. Og Suðurnesjafólk fjölmennti svo sannarlega í gönguna, hátt í 300 manns gengu og studdu þannig félagið. Það er ákaflega mikilvægt fyrir félag eins og Göngum saman að finna fyrir svo miklum stuðningi. Fólk klæddi sig vel og naut hreyfingarinnar þrátt fyrir kalsann en gengið var í sól og roki. Þetta var yndislegur dagur og mikil stemming á staðnum.

Göngum saman þakkar undirbúningsnefndinni í Reykjanesbæ og öllum þeim sem tóku þátt í göngunni fyrir að taka eins myndarlega á móti Göngum saman í bænum og raunin var. Það er gott að margir vilja ganga saman og varða leiðina til betri skilnings á eðli og uppruna brjóstakrabbameins og þannig stuðla að betri meðferð fyrir þær konur sem greinast með sjúkdóminn. Þetta er langhlaup en vonandi mun vísindafólk framtíðarinnar finna lækningu. Við tökum þátt því rannsóknirnar gefa okkur von til framtíðar.

Fréttir berast um ýmis veður í Mæðradagsgöngu Göngum saman sem fór fram víða um land á sunnudagsmorgun. Á Vesturlandi og á Vestfjörðum gallaði fólk sig upp og lét veðrið ekki stoppa sig þó mörgum hafi eflaust þótt freistandi að kúra inni í hlýjunni. Í Stykkishólmi fréttist af hálfgerðum snjókörlum og Ísfirðingar börðust móti vindinum eins og sjá má á meðfylgjandi myndum.

Það er mikilvægt fyrir Göngum saman að finna kraftinn alls staðar og hversu mikið fólk leggur á sig til að ganga saman fyrir það verðuga málefni sem félagið stendur fyrir.

Það var ánægjulegt í fyrradag er fréttist að nokkrar konur ákváðu að bæta Siglufirði inn á kortið hjá Göngum saman og auglýstu Mæðradagsgöngu þar. Sautján manns mættu og létu veðrið ekki stoppa sig í að ganga saman.Þetta var hressileg ganga og síðan endað í súpu á Torginu.

Fyrir Göngum saman er það frumkvæði sem við finnum hjá fólki um allt land ómetanlegt. Takk fyrir.

Myndirnar bera með sér að það var næðingur á Siglufirði í morgun.

Frábær stemming og skemmtilegar göngum um allt land. Yfir þúsund manns gengu á 13 stöðum í morgun og einn staður tók forskot á sæluna í gær þannig að það var gengið saman á 14 stöðum í ár.

Gengið var í fyrsta skipti í Reykjanesbæ og bæjarbúar tóku vel á móti Göngum saman og næstum 300 manns gengu í fínu veðri, sól og vindi en að vísu fekk göngufólk ókeypis salt-skrúbb er þau gengu meðfram sjávarsíðunni! Og á Egilsstöðum gengu um 40 manns í rigningu og strekkings vindi og snjókorn farin að falla í í lok göngu. Þrátt fyrir veðrið var góð stemming og fólk hafði gaman að. Það er ánægjulegt hve vel tókst til alls staðar þrátt fyrir að veðrið var víða erfitt og vitað er að fólk sem ætlaði í gönguna á Akureyri frá Dalvík komst ekkert. Þrátt fyrir leiðindarveður fyrir norðan tókst að fá um 100 manns út í veðrið að ganga á Akureyri.

Það voru einnig margir eða um 600 manns sem lögðu leið sína í Laugardalinn í dag þrátt fyrir kul í lofti. Mikil gleði og almenn ánægja. Það var mikið að gera á söluborðinu og bolirnir og buffin hans Munda slógu í gegn.

Göngum saman þakkar öllum sem tóku þátt í Mæðradagsgöngunni um allt land og öllu því frábæra fólki sem gerði þær að veruleika en það liggur mikil sjálfboðavinna að baki þessum vellukkuðu göngum. TAKK!

Frá Laugardalnum vinstra megin og Egilsstöðum hægra megin.

Fleiri myndir verða settar inn í myndaalbúm á heimasíðunni.

Það er ánægjulegt hversu mikill áhugi er á Mæðradagsgöngu Göngum saman um allt land. Nýr staður hefur bæst við.

Göngum saman hefur fengið góðan stuðning frá Siglufirði. Þar hefur Ásdís Kjartansdóttir fengið nokkrar góðar konur í lið með sér og þær ætla að ganga saman á Mæðradaginn. Lagt verður af stað frá Torginu kl. 11 og mun veður ráða för. Eftir gönguna ætla þær svo að fá sér súpu hjá Ásgeiri á Torginu.

Sjá nánar á www.sksiglo.is