Fréttir

Á morgun föstudag hefst sala á Marimekko töskum sem framleiddar eru fyrir Avon snyrtivörufyrirtækið til styrktar rannsóknum á brjóstakrabbameini. Hver taska kostar 3.995 krónur og af því renna 1.500 krónur til styrktarsjóðs Göngum saman. Einungis seldar í Avon búðinni í Smáralind.

Góð jólagjöf á góðu verði til styrktar góðu málefni.

S.l. laugardagskvöld fór fram í fyrsta skipti Brjóstaballið á vegum Göngum saman. Ballið tókst í alla staði mjög vel og það ríkti mikil gleði og stemming í skreyttum sal Iðnó. Melchior hóf kvöldið með ljúfum tónum og síðan tók hljómsveitin 5 á Richter við og hélt dönsurum við efnið. Andrea Jónsdóttir kláraði síðan kvöldið með góðri tónlist sem fólk dansaði við inn í nóttina.

Göngum saman þakkar öllum sem komu að skipulagi og framkvæmd Brjóstaballsins. Sérstakar þakkir til tónlistafólksins, Andreu og aðstandenda Iðnó fyrir að gera félaginu mögulegt að bjóða upp á þessa nýjung í starfinu.

Í dag miðvikudaginn 27. október veitti félagið íslenskum rannsóknaraðilum á sviði grunnrannsókna á brjóstakrabbameini rannsóknarstyrki að fjárhæð kr. 5 milljónir.

Þetta er í fjórða sinn sem félagið veitir styrki og með þessari styrkveitingu hefur Göngum saman úthlutað alls 17 milljónum króna til grunnrannsókna á brjóstakrabbameini á þremur árum.

Styrkurinn í ár er veittur í minningu um Kristbjörgu Marteinsdóttur en hún lést af völdum brjóstakrabbameins 11. nóvember í fyrra tæplega 45 ára gömul.

Styrkurinn skiptist á milli fjögurra aðila:
• Bylgja Hilmarsdóttir, doktorsnemi fyrir verkefnið: Hlutverk PTP1B í stofnfrumum brjóstkirtils.

• Guðrún Birna Jónsdóttir, meistaranemi fyrir verkefnið: Örflögugreining á æxlismerkjum sem tengjast sjúkdómshorfum í brjóstakrabbameini.

• Dr. Helgi Sigurðsson, prófessor og yfirlæknir á Landspítala-háskólasjúkrahúsi fyrir verkefnið: Lyfjanæmispróf á brjóstakrabbameinsfrumum.

• Dr. Rósa Björk Barkardóttir klínískur prófessor á Landspítala-háskólasjúkrahúsi fyrir verkefnið Stökkbreytileit á völdum litningasvæðum í fjölskyldum með háa tíðni krabbameins í brjóstum.

Undirbúningur fyrir Brjóstaballið í Iðnó 13. nóvember n.k.  er í fullum gangi. Miðasalan á ballið hófst á www.midi.is í gær. Einnig er hægt að kaupa miða í Iðnó.

Fjölmennum, dönsum saman, skemmtum okkur saman og styðjum grunnrannsóknir á brjóstakrabbameini í leiðinni.

Tónlistafólkið og allir sem að Brjóstaballinu koma gefa vinnu sína þannig að allur ágóði ballsins fer í styrktarsjóðinn. Göngum saman þakkar þeim öllum fyrir svo og aðstandendum Iðnó fyrir framlag sitt með láni á húsinu.

Konukvöld verður haldið í verslun Avon í Smáralind fimmtudagskvöldið 7. okt. næstkomandi á milli 19:00-21:00.Léttar veitingar verða í boði ásamt frábærum tilboðum!!  Félagar í Göngum saman verða á staðnum með sölu á fallegum lyklakippum til styrktar félaginu. Endilega kíkið við og styrkið gott málefni. Með kveðjuStarfsfólk Avon & Göngum saman. 

Nú um helgina eru heilsudagar í  WorldClass/Laugum og hefur fyrirtækið ákveðið að styrkja Göngum saman af þessu tilefni. 

Það verður mikið um að vera í Laugum n.k. laugardag 11. sept. Klukkan 15 verða tímar í þremur sölum þar sem öll innkoman fer til styrktar Göngum saman og ætlar Word Class að bæta um betur og leggur annað eins til. Það er því um að gera að fjölmenna í Laugar, hreyfa sig og styrkja um leið grunnrannsóknir á krabbameini. Sjá nánar upplýsingar á heimasíðu World Class.

Styrktarganga Göngum saman 2010 fór fram á sjö stöðum vítt um land í dag. Alls staðar var gleði og gaman og þótti ganga vel.

Í Reykjavík lagði göngufólk af stað með blásurum í broddi fylkingar. Hljómsveitin sem leiddi marseringuna heitir Orphic Oxtra og settu þau skemmtilegan svip á gönguna. Einnig spiluðu Kristín og Nanna Hlín á harmónikkur fyrir göngufólkið hér og þar á gönguleiðinni.

VIð þökkum öllum sjálfboðaliðum sem komu að skipulagningu og framkvæmd göngunnar um allt land svo og þeim sem tóku þátt og gengu með okkur.

      Orphic Oxtra leiðir gönguna í Öskjuhlíð

Reykjavíkurmaraþon Íslandsbanka fór fram í gær og hlupu 40 þátttakendur fyrir styrktarfélagið Göngum saman, til samans fóru þau 471 km og söfnuðu fyrir félagið yfir 600 þúsund krónur. Við þökkum öllu þessu fólki fyrir svo og öllum þeim sem hétu á þau.

Á Menningarnótt var Göngum saman með bás á Sirkusreitnum á Laugavegi, rétt neðan við Klapparstíginn, þar sem seldar voru möffins og djús ásamt bolum, buffum, klútum og kortum Göngum saman. Það var mikil stemming í kringum básinn og margir komu við og styrktu þetta góða málefni. Einnig var verið að vekja athygli fólks á styrktargöngunni 5. september n.k. Þökkum öllum sem lögðu hönd á plóg við undirbúning og framkvæmdina.

Vikulegar göngur hefjast á ný í Reykjavík n.k. mánudag 9. ágúst. Gengið frá Perlunni kl. 20 og gengið um Öskjuhlíðina í klukkustund.

Áfram gengið á Akureyri kl. 19:30 á þriðjudögum, sjá á döfinni, dagatal.

Rannsóknastyrkjum verður úthlutað úr styrktarsjóði Göngum saman í fjórða sinn í október n.k. og er áætlað að úthluta alls 5 milljónum króna.

Auglýst er eftir umsóknum og rennur fresturinn út 1. september 2010. Umsóknum skal skilað á sérstöku umsóknareyðublaði sem er að finna hér á heimasíðu félagsins (styrkumsokn_gongumsaman_2010.doc) og skal senda það sem viðhengi á netfangið styrkir hjá gongumsaman.is merkt – Styrkumsókn 2010 -.

Hér er að finna auglýsinguna um styrki félagsins:auglysing-styrkur10.doc