Fréttir

Í dag 4. febrúar hefst Lífshlaupið – landskeppni í hreyfingu. Guðný Aradóttir gönguþjálfarinn okkar er búin að stofna Göngum saman sem fyrirtæki á síðu Lífshlaupsins www.lifshlaupid.is og búa til eitt lið fyrir okkur. Það heitir: Lið 1 mánudagsgöngur. Það mega vera 10 í hverju liði. Við getum bara stofnað fleiri lið og svo vilja kannski einhverjir taka sig saman og stofna sitt eigið lið innan Göngum saman. En ef þið farið inn á www.lifshlaupid.is þá getið þið tengst liði 1 mánudagsgöngur. Ef það er ekki orðið fullbókað í það. Annars stofnið þið bara nýtt lið undir Göngum saman.Ef einhverjir vilja láta okkur sjá um að skrá hreyfingu sína undir okkar liði þá má senda Guðnýju upplýsingar á gudny@stafganga.is og hún skráir ykkur og hreyfinguna ykkar. Eins má prenta út eyðublað sem er á síðu Lífshlaupsins og afhenda henni á mánudögum í göngunni okkar í Reykjavík. 

Göngum saman stendur fyrir göngum fyrir félaga einu sinni í viku í Reykjavík, á Akureyri og á Dalvík. Einnig hefur verið gengið í Borgarbyggð og í Hveragerði og er það von okkar að fleiri bæjarfélög bætist í hópinn.

Rannsóknir sýna að hreyfing og útivera styrkir ónæmiskerfið og er því góð forvörn við alls kyns kvillum og sjúkdómum. Við hvetjum alla sem tök hafa á að leggja góðu málefni samstöðu og auka eigin hreysti og hreyfingu í leiðinni.

Allir þeir sem taka þátt í göngum á vegum félagsins eru hvattir til að skrá sig í félagið hér á heimasíðunni. Árgjaldið er 3000 kr. og hægt er að greiða í gegnum heimabanka.

Stofnaður hefur verið gönguhópur í Dalvíkurbyggð og ætlar hópurinn að sýna góðu málefni samstöðu og auka eigin hreysti og hreyfingu í leiðinni. Gönguhópurinn hittist fyrir framan Ráðhúsið á mánudögum kl. 17:00 og er gengið í u.þ.b. 30 mínútur.

Nánari upplýsingar veitir Sigríður Gunnarsdóttir í síma 8489442

Kæru félagar í Göngum saman.

Gleðilegt ár og kærar þakkir fyrir samhug og stuðning á liðnu ári.

Vikulegar göngur félagsins hefjast aftur mánudaginn 12. janúar. Gengið verður frá Fríkirkjunni í Reykjavík (v. Fríkirkjuveg/Lækjargötu) og lagt af stað kl. 20:00

Við hvetjum alla félaga til að mæta og ganga með góðum hópi og styrkja þannig bæði líkama og sál.

Hlökkum til að sjá ykkur og ganga með ykkur á nýju ári.

Síðastliðið þriðjudagskvöld mættu 13 konur og gengu um bæinn og fóru á kaffihús. Akureyrarkonur hafa verið duglegar að ganga í vetur og hingað til hefur ekki eitt einasta skipti fallið niður. Eftir áramót er stefnt að því að ganga frá mismunandi stöðum u.þ.b. einn mánuð í einu. Þetta verður kynnt á heimasíðunni á nýju ári!

Hér er mynd af göngukonum á kaffihúsi að lokinni göngu:-)

Göngum saman hefur hafið sölu á kortum með mynd eftir Sigurborgu Stefánsdóttur myndlistarkonu. Kortin eru seld 5 saman í pakka og kostar pakkinn 1500 kr.

Bæði er hægt að fá kortin með jólakveðju og einnig án texta og er þá hægt að nota þau sem tækifæriskort allan ársins hring.

Hægt er að panta kort á netfanginu gongumsaman@gongumsaman.is

Endilega látið vini og vandamenn vita.

Frá því í haust hafa 30-50 manns gengið með Göngum saman á mánudagskvöldum undir forystu Guðnýjar Aradóttur stafgönguþjálfara sem hefur séð til þess að allir teygji vel í lok göngu. Í september og fram í október var hist við Perluna og gengið mismunandi leiðir í og við Öskjuhlíðina. Undir lokin var orðið ansi dimmt og gott að flytja yfir í Laugardalinn en þar hefur verið gengið síðasta mánuðinn.

Nú er búið að ákveða að ganga áfram í Laugardalnum fram í aðventuna en flytja gönguna síðan niður í miðbæ og ganga saman í bænum tvö mánudagskvöld fyrir jól, þ.e. 8. og 15. desember. Þá munum við hittast við Fríkirkjuna. Reynsla okkar í fyrravetur var að þegar dimmir meira, og snjór og svell fara að vera algengara er gott að vera í vellýstum miðbænum með upphitaðar gangstéttir.

Það var ánægjuleg stund í sal Ráðgjafarþjónustu Krabbameinsfélagsins í dag er Göngum saman  veitti þrjá styrki til grunnrannsókna á krabbameini í brjóstum, alls 4 milljónir króna.
Þau sem hlutu styrk að þessu sinni voru Rósa Björk Barkardóttir fyrir verkefnið: Leit að nýjum genum sem hafa áhrif á sjúkdómsþróun hjá konum greindum með krabbamein í brjóstum. Aðalgeir Arason fyrir verkefnið: Leit að nýjum krabbameinsgenum í völdum fjölskyldum með háa tíðni brjóstakrabbameins og Þórarinn Guðjónsson og Magnús Karl Magnússon fyrir verkefnið: Hlutverk stofnfruma í eðlilegum og illkynja brjóstkirtli.

Áður en Gunnhildur formaður Göngum saman veitti styrkina afhenti Kristbjörg Marteinsdóttir, sem gekk 63 km í Avon göngunni í New York fyrr í mánuðinum, félaginu rúmlega 700 þúsund krónur í styrktarsjóð Göngum saman en peningurinn safnaðist sem áheit á Kittý í gönguninni í New York. Einnig afhentu göngufélagar Kittýrar frá New York tæplega 400 þúsund krónur í sjóðinn. Göngum saman þakkar þennan frábæra stuðning.

Við athöfnina í Skógarhlíðinni spilaði Ólafur Bogason menntaskólapiltur á klassískan gítar og Fóstbræður sungu nokkur lög.

Í dag var styrktarfélögum boðið í móttöku í höfuðstöðvum Glitnis til að taka við áheitum sem söfnuðust í tengslum við Reykjavíkurmaraþon Glitnis 23. ágúst s.l. Það er gleðilegt að segja frá því að Göngum saman var eitt fimm félaga sem þátttakendur í hlaupinu söfnuðu yfir milljón krónur í áheit fyrir. Alls hlupu 132 fyrir Göngum saman og söfnuðu áheitum fyrir samtals 1.008.600 krónur. Göngum saman þakkar þeim öllum fyrir frábæran stuðning og öllum þeim fjölmörgu sem hétu á þá. TAKK.

Stjórn Göngum saman ásamt Birnu Einarsdóttur framkvæmdastjóra hjá Glitni við afhendingu áheita úr Reykjavíkurmaraþoni Glitnis.

Nú hugsum við hlýtt til kvennanna sem voru að leggja af stað í ævintýraferð til New York til að taka þátt í Avon göngunni. Það er mikil áskorun að ganga 63 km á tveimur dögum, en um leið er það mögnuð upplifun að ganga um götur Manhattan með fleiri þúsund manns til að láta gott af sér leiða með söfnun penings til styrktar rannsóknum á brjóstakrabbameinum og bættri umönnun. Kristbjörg eða Kittý er ein þessara kvenna og hún stofnaði bloggsíðu þar sem hún ætlar að halda okkur öllum upplýstum um ferðina, sjá hér.