Fréttir

Stjórn Göngum saman auglýsir eftir umsóknum um styrki til grunnrannsókna á brjóstakrabbameini. Áætlað er að veita allt að 10 milljónum króna í styrki á árinu 2020.

Göngum saman er grasrótarfélag, sem stofnað var haustið 2007. Helsta markmið Göngum saman er að styrkja grunnrannsóknir á brjóstakrabbameini og hefur félagið úthlutað ríflega 100 milljónum króna í rannsóknastyrki til íslenskra vísindamanna frá stofnun þess.

Vísindamenn og nemendur í rannsóknatengdu framhaldsnámi við íslenska háskóla og rannsóknastofnanir geta sótt um styrk. Skilyrði er að verkefnið flokkist sem grunnrannsóknir á brjóstakrabbameini. Ekki er veittur styrkur til tækjakaupa.

Umsókn skal senda á netfangið styrkir@gongumsaman.is fyrir lok dags þriðjudagsins 1. september 2020. Ekki er tekið við síðbúnum umsóknum.

Hér má nálgast umsóknareyðublað sem umsækjendur skulu fylla út.

Hér eru almennar upplýsingar og leiðbeiningar um útfyllingu umsóknar.

Styrkir eru veittir skv. áherslum félagsins og á grundvelli faglegs mats á gæðum rannsóknarverkefna. Göngum saman getur óskað eftir frekari upplýsingum og/eða farið fram á að umsækjendur kynni verkefni sín áður en endanleg ákvörðun um styrkveitingu er tekin. Stjórn Göngum saman áskilur sér rétt til að ákveða skiptingu styrkja, sem og að hafna öllum umsóknum.

Úthlutun styrkja fer fram í október en sá mánuður er helgaður baráttunni gegn brjóstakrabbameini.

Aðalfundur Göngum saman 2020 verður haldinn á fjarfundaformi mánudaginn 18. maí nk. kl. 17:00.

Dagskrá:

1. Stjórn félagsins gerir grein fyrir störfum félagsins.
2. Stjórn leggur fram endurskoðaða reikninga félagsins.
3. Kosning stjórnar og varastjórnar.
4. Kosning tveggja skoðunarmanna og tveggja til vara.
5. Ákvörðun árgjalds.
6. Önnur mál.

Félagar eru eindregið hvattir til að taka þátt á fundinum með því að velja þessa  slóð á zoom.

Þriðja árið í röð standa meistararnir hjá Brauð&co fyrir fjáröflunarátaki fyrir styrktarsjóð Göngum saman.

Stuðningur þeirra hefur verið félaginu afar mikils virði.

Alla vikuna 4. – 10. maí verða seldir brjóstasnúðar í bakaríum þeirra.

Allt söluandvirði snúðanna rennur óskipt í styrktarsjóðinn.

Nú treystum við á að velunnarar  Göngum saman geri sér dagamun, kaupi gómsæta snúða og styrki um leið félagið.

Verði ykkur að góðu!

Í Reykjavík er gengið á mánudagskvöldum kl. 20. Á facebook síðu Göngum saman má sjá hvaðan gengið er.

Á Akureyri er gengið á þriðjudögum kl. 17. Fylgist með þriðjudagshóp GS á facebook til að fá nánari upplýsingar.

Við blásum til gleðistundar því Hlín Reykdal og Reykjavík Letterpress leggja Göngum saman lið í bleikum október. Gullfallegar lyklakippur og servíettur sem sóma sér vel hvar sem er. Tilvaldar tækifærisgjafir.

Gleðifundurinn verður hjá Hlín Reykdal, Fiskislóð 75, Reykjavík 24. október nk. kl. 16:30 – 18:30

Aðalfundur Göngum saman verður haldinn mánudaginn 11. mars nk. kl. 17:00 í sal Ráðgjafaþjónustu Krabbameinsfélags Íslands, Skógarhlíð 8, Reykjavík.

Dagskrá:

1. Stjórn félagsins gerir grein fyrir störfum félagsins.

2. Stjórn leggur fram endurskoðaða reikninga félagsins.

3. Kosning stjórnar og varastjórnar.

4. Kosning tveggja skoðunarmanna og tveggja til vara.

5. Ákvörðun árgjalds.

6. Önnur mál.

Félagar eru eindregið hvattir til að mæta á fundinn.

Með bestu kveðju, Stjórn Göngum saman.

Á mánudögum kl. 20:00 í Reykjavík sjá viðburðadagatal á heimasíðunni og facebooksíðu Göngum saman

Á þriðjudögum kl. kl. 17:00 sjá Facebook: þriðjudagshópur GS

Kærir vinir Göngum saman,  Árni og Ómar í Upplifun – blómabúðinni í Hörpu,  gáfu Göngum saman 300 pakka af dásamlega fallegum jólakúlum og hver einasta króna rennur því beint í rannsóknasjóð okkar.

Á kvennafrídaginn miðvikudaginn 24. október verður gleðistund í versluninni hjá Hlín Reykdal, þar sem sala hefst á dásamlegum ilmkertum fyrir Göngum saman og einnig verða til sýnis og sölu vatnslitamyndir í línu sem nefnist Brjóst.

Staðsetning:  Hlín Reykdal Stúdíó, Fiskislóð 75, 101 Reykjavík

Atburðurinn er milli kl. 16:00 og 18:00 og allir velkomnir.

Vinsamlegast deilið viðburðinum á facebook https://www.facebook.com/events/990275797848032/

Nánar um ilmkertið og vatnslitamyndirnar:

Ilmkertið Brjóstbirta var sérstaklega hannað af URÐ fyrir Göngum saman. Ilmurinn er ferskur, hreinn, kvenlegur, upplífgandi og veitir innblástur. Nafnið Brjóstbirta varð fyrir valinu því okkur finnst það svo fallegt og minnir á tilgang Göngum saman. Félagið safnar fé til rannsókna sem auka skilning okkar á uppruna og eðli krabbameins í brjóstum. Tilgangurinn er göfugur og bjartur.

Toppnótur Brjóstbirtu samanstanda af plómum og greipávexti. Hjartað samanstendur af sedrusviði og hvítum blómum. Grunnurinn samanstendur af sandalvið, vanillu og moskus.

Listakonan Linda Jóhannsdóttir sem starfar undir nafninu Pastelpaper vatnslitaði fallega brjóstmynd sem prýðir hvert glas. Brjóstamyndirnar hennar eru hluti af nýrri línu sem heitir einfaldlega Brjóst og rennur ágóði af sölu þeirra til Göngum Saman. Myndirnar eru unnar í blandaðri tækni þar sem meðal annars er unnið með vatnsliti, artliner og pastel.

Síðast en ekki síst sá André Visage, hönnuður hjá Wolftown, um uppsetningu og umbrot.

Fimmtudaginn 11. október s.l. veitti styrktarfélagið Göngum saman 10 milljónum króna í rannsóknarstyrki til vísindamanna á sviði grunnrannsókna á brjóstakrabbameini. Með þessari styrkveitingu hefur Göngum saman úthlutað alls rúmum 90 milljónum króna til grunnrannsókna á brjóstakrabbameini frá stofnun félagsins árið 2007.

Sjö aðilar fengu styrk að þessu sinni:

·       Anna Karen Sigurðardóttir, doktorsnemi í Líf- og læknavísindum við Háskóla Íslands -1,5 milljón kr. til verkefnisins „Tjáning, stjórnun og virkni peroxidasins í eðlilegum og illkynja brjóstkirtli“

·       Arsalan Amirfallah, doktorsnemi í Líf- og læknavísindum við Háskóla -1,0 milljón kr. til verkefnisins „Role of autophagy gene VMP1 in breast tumorigenesis and resistance of HER2 positive tumors to therapy“

·       Bylgja Hilmarsdóttir,  náttúrufræðingur á meinafræðideild Landspítala -1,0 milljón kr. til verkefnisins „Hlutverk PLD2 í brjóstakrabbameinum“

·       Hildur Knútsdóttir, nýdoktor við Johns Hopkins háskólann -1,5 milljón kr. til verkefnisins „Meinvarpamyndun í brjóstakrabbameini rannsakað með líkönum (rannsóknarstofu- og tölvulíkön): tengsl milli arfgerðar og svipgerðar“

·       Marta S. Alexdóttir, meistaranemi í Líf- og læknavísindum við Háskóla Íslands -2,0 milljón kr. til verkefnisins „Áhrif próteinanna BMP og lysyl oxidasa í æðakerfi brjóstakrabbameina“

·       Ólöf Gerður Ísberg, doktorsnemi í Lyfjavísindum við Háskóla Íslands -1,0 milljón kr. til verkefnisins „Massagreining smásameinda í brjóstakrabbameinsvef“

·       Snædís Ragnarsdóttir, meistaranemi Lífeindafræði við Háskóla Íslands -2,0 milljón kr. til verkefnisins „Áhrif FANCD2 á sjúkdómshorfur og meðferð brjóstakrabbameina“

Styrkþegar 2018 f.v.

Gunnhildur Óskarsdóttir formaður Göngum saman: Anna Karen Sigurðardóttir, Ólöf Gerður Ísberg, Marta S. Alexdóttir, Hildur Knútsdóttir, Kolka Jónasdóttir f.h. móður sinnar Bylgju Hilmarsdóttur, Arsalan Amirfallah og Anna Karen Sigurðardóttir.