Fréttir

Í ágúst s.l. fjölmennti hópur í Kerlingarfjöll til að ganga til góðs. Þarna voru á ferðinni starfsfólk Icelandair Group og fjölskyldur þeirra en þetta var í fjórða sinn sem Golden Wings skipuleggur slíka göngu á Íslandi. Í ár var ákveðið að styrkja Göngum saman.

Í ár styrkti ITS gönguna með kaupum á bleikum buffum Göngum saman og settu buffin skemmtilegan svip á gönguna sem farin var í björtu og fallegu veðri. Golden Wings styrkti Göngum saman um samtals 345 þúsund og þökkum við þeim kærlega fyrir þetta góða framlag.

Saga Golden Wings er jafngömul Göngum saman því upphaf beggja félaganna má rekja til Avon göngunnar í New York haustið 2007 er upphafskonur þessara félaga gengu eitt og hálft maraþon um Manhattan til styrktar rannsóknum á brjóstakrabbameini.

Vísindamenn á Rannsóknarstofu í stofnfrumufræðum við Lífvísindasetur Háskóla Íslands og Landspítalann hafa birt grein í lífvísindaritinu PLoS ONE, þar sem þeir sýna fram á hvernig æðaþelsfrumur geta umbreytt stofnfrumum í brjóstkirtli í bandvefslíkar frumur.

Rannsóknin var hluti af doktorsverkefni Valgarðs Sigurðssonar og snerist um að þróa þrívítt frumuræktunarlíkan þar sem æðaþelsfrumur voru ræktaðar með stofnfrumum úr brjóstkirtli. Valgarður er einn af styrkþegum Göngum saman.

http://www.mbl.is/frettir/innlent/2011/09/08/skilja_betur_edli_meinvarpa/

Göngum saman fékk tæpar 1.250 þúsund kr. í áheit og var í 8. sæti af 138 góðgerðafélögum en þetta kom fram í áheitaskýrslunni sem afhent var í Ráðhúsinu í gær. Frábær árangur og við þökkum enn og aftur öllum þátttakendum og þeim sem hétu á þá.

Mikil gleði og stemning ríkti í morgun þegar fólk mætti á 11 stöðum á landinu til að ganga til styrktar grunnrannsóknum á brjóstakrabbameini. Samtals gengu hátt í 1000 manns og lögðu þannig málefninu lið. Margir sjálfboðaliðar komu að undirbúningi og framkvæmd göngunnar og er þeim þakkað fyrir ómetanlegt starf. Einnig þeim fyrirtækjum sem studdu gönguna í ár og síðast en ekki síst er öllum sem gengu saman í dag þakkað fyrir stuðninginn.

Óvæntur stuðningur birtist í Valsheimilinu í morgun þegar U21 landsliðið í fórbolta klæddist Göngum saman bolum á æfingu sem fram fór á Valsvellinum á svipuðum tíma og gangan var.

Mikil stemning var við Hlíðarenda í morgun þegar gangan lagði af stað við undirleik brassbands.

Þrjátíu og einn hljóp Skeiðshlaup í morgun. Lagt var af stað frá bænum Skeiði í Svarfaðardal og  og hlaupið upp í fjöll að Skeiðsvatni, fyrir fjöllin og til baka í gegnum berjaland og yfir tún heim til Skeiðum. Leiðin er um 13 km löng (12,86 km) og að hluta til dráttarvélaslóð, síðan kindaslóð og síðan malarvegur. 1000 kr. af þátttökugjaldinu rennur til Göngum saman.

Göngum saman þakkar þátttakendum innilegar fyrir og ekki síður Myriam og Ingimar á Skeiði fyrir að skipulagningu og frumkvæði.

Um allt land er nú verið að undirbúa styrktargönguna sem verður á sunnudaginn kl. 11 á 11 stöðum hringinn í kringum landið.

Í vikunni var viðtal á N4 við forsvarskonur Göngum saman á Akureyri og við munum heyra meira af Göngum saman starfinu í fjölmiðlum næstu daga. Fjölmennum í gönguna á sunnudaginn um allt land.

Búið er að opna fyrir skráningu hér á heimasíðunni en einnig er hægt að borga á staðnum, fólk hvatt til að mæta snemma og vera með reiðufé.

Göngum saman á Akureyri var með kynningarbás á kaffihúsinu Kaffi Költ á Akureyri á Akureyrarvöku. Þar var Stóra styrktargangan kynnt og vörur til sölu auk þess sem hægt var að skrá sig í gönguna.

Hægt er að fylgjast með undirbúningi göngunnar á Akureyri á FB.

Konurnar notuðu tímann til að prjóna bleikar húfur með merki félagsins sem þær hyggjast nota í Stóru göngunni um næstu helgi.

Nú líður að árlegri styrktargöngu Göngum saman en í ár verður gengið sunnudaginn 4. september kl. 11.

 Í Reykjavík verður gengið á sömu slóðum og í fyrra en gangan hefst á Valssvæðinu að Hlíðarenda og  verða tvær vegalengdir í boði; 3,8 km um Öskjuhlíð og 7 km flugvallarhringur.  Utan Reykjavíkur verður gengið 10 stöðum. Þessir staðir eru: Akranes, Stykkishólmur, Patreksfjörður, Ísafjörður, Hólar í Hjaltadal, Akureyri, Egilsstaðir, Reyðarfjörður, Höfn og Selfoss. Göngugjald fyrir fullorðna, kr. 3.000, rennur það óskipt í styrktarstjóð Göngum saman. Frítt fyrir börn. Allir sem greiða göngugjaldið fá höfuðbuff með merki félagsins. Nánari upplýsingar hér á síðunni undir Stóra gangan.  Göngum saman um allt land 4. september, takið daginn frá … 

Frábær þátttaka var í Reykjavíkurmaraþoninu í morgun í dásamlegu veðri. Eitt hundrað manns tóku þátt fyrir félagið og nú er áheitasöfnun komin í eina milljón!

Innilegar þakkir til allra þátttakenda og þeirra sem hétu á þá.

Við verðum með hvatningalið á horninu á Lynghaga og Ægissíðu eins og undanfarin ár frá klukkan 8:45 en þá getum við átt von á fyrstu hlaupurunum. 

Takið með ykkur hluti sem heyrist í s.s. hrossabresti og eldhúsáhöld … því fleiri sem koma og hvetja þátttakendur því skemmtilegra!

Áheitasöfnun er nú í fullum gangi og tækifæri til að heita á hlaupara. Látum gott af okkur leiða og heitum á þetta flotta fólk, sjá http://hlaupastyrkur.is/godgerdafelog/felag/650907-1750