Fréttir

Reykjavíkurmaraþon Íslandsbanka fer fram laugardaginn 20. ágúst n.k. Nú hefur áheitavefur verið opnaður og er áheitasöfnun í tengslum við hlaupið hafin á www.hlaupastyrkur.is  Í fyrra söfnuðust um 30 milljónir til góðra málefna.

Við hvetjum alla til að leggja styrktarfélaginu Göngum saman lið með því að:
A) hlaupa/ganga fyrir Göngum saman og hefja söfnun með því að fara inn á hlaupastyrkur.is og nýskrá þig. Í nýskráningunni  velur þú Göngum saman af  listanum hér.
B) heita á hlaupara Göngum saman. Hver sem er getur farið inn á hlaupastyrkur.is og heitið á skráða hlaupara. Hægt er að greiða áheit með kreditkorti eða með því að senda sms skilaboð.

Haustganga Göngum saman verður haldin víða um land sunnudaginn 4. september . Enn er verið að vinna í staðsetningum og skipulagi en takið daginn endilega frá.

Ef einhverjir hafa áhuga á að skipuleggja Göngum saman göngu í byggðalagi sínu þá endilega hafið samband við Margréti Baldursdóttur (margret.baldurs hjá internet.is) eða gongumsaman hjá gongumsaman.is.

Fyrir göngu í Laugardalnum í gærkvöldi veitti Jói Fel formaður Landssambands bakarameistara Göngum saman höfðinglegan styrk að upphæð 1.080.000 kr. í tengslum við sölu brjóstabollanna á mæðradaginn 8. maí s.l.

Göngum saman færir þeim bestu þakkir fyrir.

Við afhendingu styrks LABAK til Göngum saman en bakarar bökuðu brjóstabollur handa landsmönnum í kringum mæðradaginn. Til vinstri, Ragnhildur Zoega frá GS, Jói Fel fomaður LABAK, Ragnheiður Héðinsdóttir SI og Gunnhildur Óskarsdóttir formaður GS.

Hugleiðslugangan í Laugardalnum var mjög vel heppnuð. Rúmlega fjörtíu manns mættu og gengu saman og fóru með ákveðna möntru í huganum, önduðu og gengu í takt undir leiðsögn Arnbjargar Kristínar Konráðsdóttur Kundalini jógakennara.

Göngum saman þakkar Arnbjörgu kærlega fyrir.

Ákveðið hefur verið að fresta hugleiðslugöngunni í kvöld vegna loftslagsskilyrða. Stefnt er að því að hún verði eftir viku, mánudaginn 30. maí kl. 20.

Það verður því ekki Göngum saman ganga í kvöld í Reykjavík.

Dr. Sigríður Klara Böðrvarsdóttir líffræðingur sem var ein þeirra sem fengu styrk Göngum saman við fyrstu úthlutun félagsins árið 2007 skrifar grein í Morgunblaðið í morgun um Nóbelsverðlaunahafann Elízabeth Blackburn sem heldur fyrirlestur í hátíðarsal Háskóla Íslands n.k. laugardag kl. 14. Blackburn hlaut verðlaunin í líf- og læknavísindum haustið 2009 ásamt Carol Greider og Jack Szostak. Uppgötvun þeirra var gerð í frumstæðum einfrumungi en hefur haft mikla læknisfræðilega þýðingu sem vísindafólkið hefur sjálfsagt ekki gert sér grein fyrir á 8. og 9. áratugunum er rannsóknir þeirra fóru fram. Þetta er gott dæmi um hvernig grunnrannsóknir geta leitt til hagnýtingar þó ekki sé hægt að spá fyrir um það. Nánari upplýsingar um fyrirlesturinn sem skipulagður er í tilefni 100 ára afmælisHaskólans er að finna á heimasíðu HÍ.

Nú eru að hefjast á ný göngur í Kjarnaskógi við Akureyti. Gengið verður alla þriðjudaga í sumar nema tilkynnt verði um annað hér á heimasíðunni. Lagt af stað kl. 19:30 frá bílastæðinu við Kjarnakot.

ALLIR velkomnir.

Mæðradagsganga Göngum saman var haldin í Kaupmannahöfn í fyrsta skipti. Um fjörtíu manns gengu í dásamlegu veðri í Östre Anlæg og þar í kring. Inga Harðardóttir leiddi gönguna sem hófst og endaði í Jónshúsi en þar var kórinn Staka með kaffisölu. Þetta var frábær ganga og mikil stemning í hópnum. Vonum við að þetta verði bara upphafið af fleiri mæðradagsgöngum í Kaupmannahöfn. Sjá myndir úr göngunni undir Myndaalbúm

Mæðradagsganga Göngum saman fór einstaklega vel fram á fimm stöðum en gengið var í Laugardalnum í Reykjavík, í Hveragerði, Borgarnesi, á Dalvík og formaðurinn Gunnhildur Óskarsdóttir leiddi göngu frá Jónshúsi í Kaupmannahöfn. Það var mikil stemming á öllum stöðunum og fólk naut sín í veðurblíðunni.

Í Laugardalnum spiluðu Kristín og Nanna Hlíf á harmónikkur sínar fyrir göngufólk en þær setja alltaf svo skemmtilegan svip á göngur Göngum saman. Einnig skemmti ungur saxafónleikari Björn Kristinsson gestum með leik sínum.

Myndir frá göngunni í Laugardal eru komnar inn á myndasafnið hér á síðunni og vonandi koma myndir frá hinum stöðunum líka fljótlega.

Arnór Þ. Sigfússon tók þessa mynd í mæðradagsgöngu Göngum saman í Laugardalnum þar sem smáir og stórir nutu þess að ganga í góða veðrinu.

Okkur berast stöðugt fréttir um fyrirtæki og stofnanir sem bjóða starfsfólki sínu upp á brjóstabollur. Það er frábært að heyra af þeim stuðningi sem felst í þessu við það málefni sem Göngum saman vinnur að, þ.e. að geta stutt vísindafólk okkar til góðra verka og gefa okkur von um lækningu við brjóstakrabbameini í framtíðinni.

Í dag bauð Arionbanki starfsfólki sínu í Borgartúni upp á brjóstabollur og er myndin tekin við það tækifæri. Einnig höfum við frétt að starfsfólk útibúa, t.d. í Borgarnesi og á Akureyri var boðið í bollukaffi í gær.